L’associacion

L’associacion Calandreta de Lescar qu’estó creada en 1992. Que participa activament au projècte Calandreta e qu’ei garanta de la gestion entà assegurar, dab los regents, un bon foncionament de l’escòla. Las ressorças financèras que vienen de las collectivitats locaus, de las adesions e de las accions miadas peus pairs.

Un conselh d’administracion (C.A.) qu’assegura lo foncionament de l’associacion. Los ensenhaires qu’i son representats. Qu’ei lo lòc de decision. Los membres deu C.A. que son elejuts au cors de l’amassada generau qui’s hè un còp l’an.

Que i son tanben comissions qui mian ua reflexion e perpausan accions dens maines diferents entà assegurar un bon foncionar de l’escòla. Cada pair que i pòt participar. L’escòla e l’associacion que son hèra ligadas. Qu’ei a cada pair, regent o membre de l’associacion de balhar vita a aqueste ligam. Cadun que pòt portar las competéncias soas au projècte.

Las manifestacions organizadas per l’associacion que son tanben lo parat d’encontrà’s e de ligà’s dab las autas familhas, e qu’ei atau qui, tot au long de l’annada, que perpausam activitats tà amassar mainats, pairs e equipa pedagogica : l’aperitiu de la rentrada, ua dimenjada en montanha tà facilitar l’arribada de las familhas navèras, lo garfo deus reis, la hèsta de l’escòla…

 

Calandreta dens la vita locau

Desempuish la soa creacion, la Calandreta que participa hèra a la vita sociau e culturau suu parçan de Lescar. Que tribalha dab l’Esquireta, associacion culturau de Lescar, a l’organizacion de mantuas animacions com la « Dauba de Nadau » en deceme o lo « Huec de la Sent Joan » cada junh au còr de la ciutat…

L’associacion que participa tanben a « Touskiflot », au « Festival de la petite enfance » a Pau, a la « Faites du Sport » a Lescar en junh… Aquestas manifestacions que perrmeten de har conéisher l’escòla e d’equilibrar lo budget de l’associacion.

Augan, peu dusau còp, l’escòla que participa a las « Journées départementales des familles » en ligam dab lo Réseau Appui Parent, los organismes e las associacions de Lescar ligats a la mainadèra. Calandreta que perpausa talhèrs, animacions e ua conferéncia suu tèma deu desvolopament deus mainatges.

Los associatius e l’equipa pedagogica qu’aprèstan d’ara enlà dab l’associacion « Viravent » los vint ans de l’escòla. La hèsta que’s debanarà lo 6 de julhet 2013. dab un concèrt deu grop « Nadau » e un hèish d’animacions peus petits e grans.

L’escòla que participa a mantuns concors, literaris o autes organizats per associacions o organismes locaus

L’escòla qu’ei integrada a las activitats periscolaras perpausadas peus servicis municipaus de la vila de Lescar, suu temps periscolar.

 

Calandreta Lescar que hè partida d’un movemen

Calandreta Lescar qu’ei un deus dètz establiments escolars deus Pirenèus-Atlantics (nau escòlas e un collègi) e deus tretze establiments de la region Aquitània.

Cada escòla qu’ei sòcia de la Federacion departamentau e de la Federacion regionau.
Las escòlas que son totas sòcias de la Confederacion occitana de las escòlas associativas laïcas calandretas.
Calandretas, que n’i a sus tot lo domeni occitan.